Vigo será capital do sector conserveiro durante a VI Conferencia Mundial do Atún "Vigo 2013"

Xunto ao secretario xeral do Mar e ao secretario xeral de ANFACO, a tenente de alcalde, Carmela Silva, presentou hoxe mércores a Conferencia que reunirá en Vigo, os días 9 e 10 de setembro, a máis de 300 diretivos de 29 empresas que concentran o 90% da produción mundial de conservas de pescados e mariscos.

mércores, 4 set 2013
1378296022anfaco.JPG
Carmela Silva, no nome do alcalde de Vigo, indicou que "somos cidade da economía, da industria, da innovación, somos unha cidade global" con "unha enorme capacidade de competir" a nivel internacional. A tenente de alcalde salientou que "Vigo vai ser punto de referencia mundial no atún", un tema "de enorme importancia para a nosa cidade, para a industria da conserva, para Galicia e non esaxeramos se dicimos que de enorme importancia para España".

Coa organización desta conferencia a cargo de ANFACO-CECOPESCA, Vigo será durante dous días a capital mundial do sector atunero, conserveiro e transformador de produtos do mar e as súas industriais auxiliares. A cidade será punto de encontro da exposición e debate de aspectos tan relevantes como o abastecemento de materia prima e a elaboración e comercialización de conservas de atun.

Participarán na Conferencia máis de 300 directivos que lideran empresas radicadas en 29 países que elaboran ou comercializan os seus produtos nos cinco continentes, concentrando o 90% da produción mundial de conservas de peixes e mariscos. Se trata de países tan relevantes no mundo das conservas de peixes e mariscos como Italia, Francia, Portugal, Reino Unido, Países Baixos, Bélxica, España, Ecuador, México, EUA, Panamá, Guatemala, El Salvador, Uruguai, e Brasil, Costa de Marfil, Marrocos, Gabón, Túnez, Thailandia, Corea, Papúa Nova Guinea, China, Malaisia, Taiwán, Indonesia, Seychelles, Isla Mauricio, Israel... entre outros.

Así mesmo, destaca a presenza de destacados representantes de administracións como a DG Mare-UE, DG Trade-UE, Ministerio de Agricultura, Alimentación e Medio, e a Consellería do Medio Rural e do Mar.

Esta Conferencia enmárcase no ámbito do "Foro Internacional de Conservación de Produtos da Pesca de Galicia", creado por ANFACO-CECOPESCA en 1995 e que dende entón vén organizando, con periodicidade anual, diferentes conferencias para analizar a situación presente e futura do sector transformador dos produtos da pesca e da acuicultura, así como as distintas problemáticas e incidencias que a transformación e comercialización destes produtos presenta a nivel internacional.
Descargar todas as imaxes