Esta semana remata o prazo de solicitudes para acollerse a esta nova bonificación fiscal voluntaria da Concellería de Economía e Facenda, incluída por primeira vez neste 2009. Este sistema supón un aforro do 3% do IBI e fracciona o pago en dous prazos, sen recargo nin interese algún. Os solicitantes poden acollerse no rexistro do Concello ou a través da web municipal.
Co obxectivo de difundir a figura e a obra de Urbano Lugrís a Concellería de Patrimonio Histórico e co Museo de Castrelos organizan o ciclo de conferencias "En torno a Urbano Lugrís", que se desenvolverá os días 26 e 27 de febreiro no auditorio da Casa Galega da Cultura a partir das 20:00 horas. A concelleira Elena Maure salientou que se trata "dunha oportunidade única para afondar no coñecemento "dun dos máis xeniais creadores galegos de todos os tempos".
O Concello aprobou na última reunión da xunta de goberno o convenio de colaboración coa Xunta para a construción do novo estadio de atletismo de Balaídos e dun pavillón polideportivo en Candeán. O investimento estimado destas dúas obras ascende a 6.963.953 euros, dos que a Consellería de Cultura e Deporte asumirá casi cinco millóns de euros e os dous restantes sairán dos orzamentos do Concello.