Escoitar

A concelleira de Benestar Social visita a carpa da ”Asociación de Diabéticos de Vigo”

mércores, 14 nov 2001
imx788.jpg
Belén Sío, Antonio López e Delfín Fernández
A concelleira de Benestar Social, Belén Sío, visitou a carpa instalada na rúa do Príncipe con motivo do Día Mundial da Diabete. Numerosas persoas achegáronse para medir os niveis de glicosa no sangue e conseguir información sobre esta enfermidade.

A Asociación de Diabéticos de Vigo pretende conseguir que esta doenza non represente dificultades para quen a padeza e erradicar a anomalía diabética mediante a estimulación da investigación científica, segundo explicou o seu presidente, Antonio López.

O colectivo de familiares, amigos e profesionais da sanidade que integran a asociación proporcionan a información diabetolóxica que representa un piar básico do tratamento. Organiza cursiños, ofrece asesoramento, representación perante os organismos oficiais e fai chegar o contido de publicacións especializadas sobre diabete ós seus asociados.

Os interesados en conseguir máis información poden dirixirse á Asociación de Diabéticos de Vigo situada na rúa Don Bosco, nº 41, local 12.

Descargar todas as imaxes