Caballero saúda aos asistentes do encontro "Con-Tacto" que promove a inclusión no ámbito laboral
Na xornada, celebrada no Hotel Attica 21, o alcalde louvou o impulso da empresa e das administracións neste eido.
O evento reuniu un grupo de representantes institucionais e empresariais de Vigo para favorecer o diálogo directo e a creación de redes de colaboración entre os distintos actores implicados na inclusión. O obxectivo do encontro é promover no tecido empresarial español a inclusión laboral de todas as persoas, incluídas aquelas que teñen discapacidade e as pertencentes a outros colectivos en situación de vulnerabilidade.
As persoas asistentes puideron coñecer a experiencia de Javier García Pajares, cunha importante traxectoria persoal e profesional: foi o primeiro estudante Erasmus con xordocegueira, rematou un dobre grao en Dereito e ADE cun expediente brillante e ascendeu algunhas das montañas máis altas do mundo.
Como elemento central, as persoas asistentes participaron nun almorzo ás cegas, unha experiencia de sensibilización que convida a reflexionar sobre as barreiras que pode atopar unha persoa con discapacidade visual no seu día a día e sobre que podemos facer para construír un contorno cada vez máis inclusivo.
A sesión concluíu coa presentación de conclusións e propostas para avanzar na construción de contornos empresariais máis inclusivos, innovadores e sostibles, en consonancia cos valores de ILUNION e a Fundación ONCE, que organizaron a xornada.