Intensa fin de semana no Auditorio Municipal con tres obras teatrais de "VigoCultura"
O programa municipal de artes escénicas “VigoCultura” desprega esta fin de semana un amplo cartel con tres representacións. O Auditorio Municipal acolle mañá venres a obra de Produccións Teatrais Excéntricas “As desterradas”. O sábado está programada “A violación de Lucrecia“, do Teatro Clásico de Sevilla, e o domingo o público familiar contará con “Nanai da China” da compañía galega Pérez&Fernández.
O Auditorio Municipal acolle mañá, a partir das oito do serán, a representación de "As Desterradas". A obra de Carme Varela recibiu o 25 Premio Álvaro Cunqueiro para textos teatrais. O elenco da representación, dirixido por Quico Cadaval, está composto por Melania Cruz , Patricia Vázquez, Rebeca Montero, Rocío González, María Costas e Víctor Mosquera. A iluminación é responsabilidade de Laura Iturralde.
Teatro Clásico
O sábado 5 o Teatro Clásico de Sevilla poñerá en escena a obra "A violación de Lucrecia", peza teatral centrada non poema de William Shakespeare, de 1594. Alfonso Zurro escribiu e desenvolveu unha dramaturxia especial. Primeiro para articulalo como monólogo feminino, e despois, para abrilo en varias liñas dramáticas que amplían o feito histórico e achegándoo ata actualidade. Lucrecia coloca ao espectador ante a violencia e a crueldade dun acto terrible.
O espectáculo, cun gran recoñecemento nop panorama teatral, recibiu tres premios "Escenarios de Sevilla" 2023, incluíndo Mellor espectáculo, Mellor actriz para Lorena Ávila, e Mellor adaptación teatral. Ademais, en 2024 recibiu o Premio Lorca ao Mellor Autor, Alfonso Zurro.
Monicreques
O domingo a compañía galega Pérez&Fernández interpreta a obra "Nanai da China", destinada ao público familiar. Trátase dun espectáculo de teatro para público familiar onde os monicreques e os actores representan un conto orixinal cheo de maxia, aventuras e humor. A peza foi gañadora do Premio María Casares 2024 na categoría de monicreques.