Abel Caballero celebra acoller o congreso de CEOMA e reivindica que a idade é “un activo”
Durante a presentación do XII Congreso Nacional de Organizacións de Maiores, o alcalde afirmou que o papel das persoas maiores na sociedade é “unha revolución en marcha”. A cidade acollerá este evento os próximos 24 e 25 de abril na sede de Afundación.

Abel Caballero celebra que Vigo acolla o XII Congreso Nacional de Organizacións de Maiores, organizado por CEOMA, e destaca que a idade é “un activo”. Durante la presentación deste evento, reivindicou que a idade “non é un factor de exclusión, senón de inclusión”. Tras recordar que nunha soa xeneración “o mundo a nivel tecnolóxico mudou”, o alcalde confirmou que o papel das persoas maiores na sociedade é unha “revolución en marcha” e animou ao colectivo a “rachar a barreira ao temor de enfrontarse a esta nova era”. Na súa opinión, “a forza física era importante antes, agora éo a intelectual, é un xeito distinto de entender a sociedade a nivel cultural, deportivo… somos útiles e vitais”.
O XII Congreso Nacional de Organizacións de Maiores terá lugar os próximos 24 e 25 de abril no auditorio de Afundación Vigo e reunirá a máis de medio centenar de profesionais do sector que debaterán, entre outras cuestións, o talento sénior, o papel da muller na dirección das organizacións, a economía prateada, os malos tratos á vellez ou o humanismo dixital.
Pola súa banda, o presidente de CEOMA, José Luis Fernández Santillana, destacou a importancia de valorar o talento sénior, un dos eixos do congreso. Neste sentido, quixo deixar claro que “non por ser maior unha persoa é un elemento decorativo” e “o seu futuro non ten que pasar por estar na casa”.
Tamén interveu a presidenta do Comité de Organización do XII Congreso, Mariña Troncoso, que repasou as principais liñas de debate que se tratarán, como o traballo máis aló dos 50 anos, o cambio climático, o papel da muller ou o humanismo dixital.