O goberno de Vigo renova o programa socioeducativo para vítimas de violencia de xénero
O alcalde informou da decisión, adoptada na Xunta de Goberno Local, de prorrogar o servizo de atención social e educativa para as usuarias dos pisos municipais nos que o Concello aloxa a mulleres vítimas de violencia machista e ás persoas delas dependentes.
“Proporcionamos o apoio para que poidan desenvolver a súa vida normal, para que as súas familias, os seus fillos e fillas, poidan seguir adiante cos seus procesos de educación”, explicou este xoves Abel Caballero, quen resaltou que se trata dunha “atención integral” ás mulleres prestada desde o Concello de Vigo.
A administración local viguesa conta cunha rede municipal de vivendas de protección para vítimas de violencia de xénero composta por tres pisos e quince vacantes en total. Nestas casas se acollen ás mulleres (e fillos e/ou persoas dependentes) que carecen de recursos económicos e persoais para afrontar a situación de ruptura co agresor.
Durante a súa estadía, o Concello de Vigo presta unha atención multidisciplinar orientada á recuperación da súa autonomía. Parte desta función desenvólvese co programa aprobado polo goberno local, que dota ás familias das ferramentas necesarias para encarar con éxito a súa nova vida. “A nosa vocación de atención ás mulleres vítimas de violencia de xénero é total, estamos facéndoo e seguiremos facéndoo”, concluíu Caballero.