O goberno de Vigo adxudicou a humanización do último tramo de Serafín Avendaño
A Xunta de Goberno Local deu luz verde á adxudicación da remodelación da vía no treito pendente de arranxar, o comprendido entre as rúas Areal e Rosalía de Castro, cun orzamento próximo aos 300.000 euros. Abel Caballero comunicou ademais a aprobación do convenio coa Rede de Mulleres contra os Malos Tratos, asociación que recibe 100.000 euros do Concello.
O Concello de Vigo completará a humanización da céntrica rúa de Serafín Avendaño e iniciará en breve as obras logo da súa adxudicación este xoves na Xunta de Goberno Local. A reforma afectará á parte baixa da vía, a comprendida entre Rosalía de Castro e Areal, e contempla un orzamento próximo aos 300.000 euros.
Abel Caballero informou este mesmo xoves da decisión e fixo fincapé nas cautelas arqueolóxicas que se tomarán durante os traballos. Cun procedemento “complexo”, o alcalde explicou que a humanización conta cun proxecto arqueolóxico -ademais do visto bo de Patrimonio- e que se controlarán os movementos de terras no transcurso das obras.
O Concello remodelará Serafín Avendaño seguindo o mesmo criterio que impera no entorno, con beirarrúas de granito, nova iluminación, xardineiras, mobiliario urbano, sinalización e semaforización, ademais de cambiar as redes soterradas de saneamento e abastecemento de auga. O rexedor vigués recordou que o Concello acometeu na zona humanizacións nas rúas Areal, Rosalía de Castro e García Barbón, ademais de nas transversais: a propia Serafín Avendaño, Canceleiro, Oporto, Heraclio Botana e rúa Roupeiro.
Convenio
En segundo lugar, Caballero deu conta do convenio de colaboración aprobado na Xunta de Goberno Local en favor da Rede de Mulleres Veciñais contra os Malos Tratos de Vigo para o apoio do seu programa de actividades, que abranguen o acompañamento ás vítimas, a reincorporación psicosocial, a formación e a concienciación, prevención e denuncia social.
Segundo as cifras aportadas polo alcalde, o goberno que dirixe achega á entidade 100.000 euros anuais en virtude de diferentes partidas, entre as que se atopa o convenio validado este xoves, por valor de 30.300 euros. Amais, o Concello coopera coa Rede con subvencións en materia de emprego e igualdade e no pago do alugueiro do seu local, acadando así os 100.000 euros que representan “practicamente todo o financiamento” da asociación, en verbas de Caballero, quen destacou que a administración local adica millón e medio de euros á igualdade e á loita contra a violencia de xénero.