Escoitar

Emprego crea unha campaña de promoción do comercio de proximidade

O concelleiro de Emprego, Delfín Fernández, afirmou que Vigo se consolida como primeira potencia comercial de Galicia con 4.500 establecementos que facturaron 1.700 millóns de euros no pasado ano.

xoves, 20 mar 2003
Baixo o lema "O comercio fai cidade", a Concellería de Desenvolvemento Local e Emprego, no marco do Servicio a emprendedores (SAE-Comercio), porá en marcha este mes unha campaña de promoción do pequeno e mediano comercio, na que a través de valados publicitarios, rotulación externa en autobuses e carteis informativos se pretende concienciar os cidadáns da importancia deste sector como elemento dinamizador económico e social das cidades, neste caso de Vigo.

O Sae-Comercio, que promove esta campaña informativa cun custo de 10.247 €, é un proxecto piloto que se realiza desde o mes de outubro, a través dun convenio con Caixanova, e que ten por obxecto acadar unha maior profesionalización e unha imaxe máis coherente do Vigo comercial.

O concelleiro de Desenvolvemento Local e Emprego, Delfín Fernández Álvarez, destacou que das 1.736 persoas que recibiron asesoramento para crear unha empresa, desde o inicio do Plan municipal de emprego no ano 2000, o 60% estaban interesadas en ser emprendedoras no sector do comercio. Por outra parte, e tamén como unha das razóns da aposta do Plan municipal de emprego polo sector, Fernández cifrou en 14.175 as persoas empregadas no pequeno e mediano comercio da cidade.

O Sae-Comercio, na mesma liña da campaña de promoción "O comercio fai cidade", ten previsto organizar un programa de seminarios, dirixidos ós comerciantes, no que se abordarán temas como os centros comerciais abertos, a integración de mercado, ocio e comercio e as claves do éxito do sector.

Máis información