O Nadal da cidade permanecerá acendido ata o domingo 11 de xaneiro
O alcalde avanzou este venres a data de apagado da iluminación da cidade, mentres a programación continúa e, este sábado, a Porta do Sol acolle o espectáculo “O tamborileiro do Nadal”, cunha previsión media de ocupación hoteleira de case o 75% para a fin de semana.
“Seguimos con niveis de afluencia moi importantes, que se reflicten no nivel de ocupación hoteleira e de restaurantes e establecementos”, avanzou Caballero que deu conta dos datos de ocupación previstos para a fin de semana: o venres preto do 90%; o sábado 80% e o domingo superará o 50%.
Para o alcalde son “niveis estratosféricos” cunha media de ocupación hoteleira, para estes tres próximos días, de case o 75%. Así, apuntou que o Goberno municipal manterá a iluminación do Nadal ata o domingo 11 de xaneiro: “co apagado da iluminación de Vigo apágase o nadal en todo o planeta. Un gran Nadal que vivimos con felicidade, emprego, ocupación e crecemento económico nun clima social marabilloso en Vigo”.
Espectáculo Porta do Sol
Esta fin de semana continúan as propostas da programación do Nadal da cidade. O sábado ás 19:30 horas, na Porta do Sol, diante da gran árbore, celébrase o espectáculo “O tamborileiro do Nadal” no que participan o Coro Acopovi, a Agrupación Musical Atlántida de Matamá e o cantante Richard Sánchez. Interpretarán un programa variado, con especial atención á música do Nadal con de panxoliñas e temas como o Tamborilero.