Caballero destaca os investimentos do Goberno de España en Vigo na inauguración do Paseo de Beiramar
As obras de humanización de Beiramar, inauguradas este martes, enmárcanse tanto na “forma de entender o desenvolvemento de Vigo”, coa construción de paseos urbanos e verdes, como no apoio do Goberno a numerosos e importantes proxectos de Vigo asignando fondos europeos do Plan de Recuperación. Así o recalcou o alcalde ante o secretario de Estado de Transportes, o delegado do Goberno en Galicia, o presidente da Xunta e o máximo responsable da Autoridade Portuaria de Vigo, no acto que contou coa participación de integrantes de Autismo Galicia e do Grupo Once.
Abel Caballero puxo en valor hoxe que unha parte importante do financiamento das obras de humanización de Beiramar proceden de fondos europeos que o Goberno de España transfire á Xunta para que esta os destine ao porto de Vigo. “Esta é unha forma de actuar importante e nós queremos que en Vigo se sigan utilizando e levando adiante fondos europeos”, recalcou o alcalde tras felicitar aos responsables da Autoridade Portuaria polo traballo desenvolvido para a construción do paseo.
O rexedor agradeceu ante o secretario de Estado de Transportes, José Antonio Santano, a asignación a Vigo de recursos europeos do Plan de Recuperación, Transformación e Resiliencia. Explicou que entre os investimentos destacan os destinados á construción do Halo; así como ás ramplas da Gran Vía, Paseo Granada, Gandarón, Ramón Nieto, Teis, Escultor Gregorio Fernández; así como a Vía Verde; zonas de baixas emisións; ou os ascensores de Hispanidade, Travesía e da rúa Aragón e a humanización da rúa Romil. Lembrou que a achega estatal tamén contribúe á rexeneración da Praia de Samil, á musealización da muralla do Castro, ao Centro histórico de Bouzas, ao Pazo de Raposeira, aos Mupis, á subvención ao transporte urbano ademais de á ciberseguridade do Concello ou ao Kit Dixital. Apuntou tamén a contribución estatal á pista do aeroporto, o PERTE do automóbil, o Sparc, a moi alta tensión, a remodelación da Avenida de Madrid, a humanización da AP9, a construción da variante do AVE por Cerdedo, o trazado da autovía A52 en túnel, a saída Sur ferroviaria e a Biblioteca do Estado, entre outras. "Isto é unha mostra do que podemos facer cando cooperamos, cando atopamos a forma real da cooperación”, incidiu Caballero.
Cooperación
O secretario de Estado de Transporte destacou a importancia do porto como “motor da economía e o emprego”, cun crecemento do 17 por cento rexistrado en 2024, así como a relevancia do desenvolvemento de proxectos como o de Bouzas que incidan na unión coa cidade.
Santano lembrou que entre os investimentos recentemente aprobados polo Goberno para Vigo, financiados con Fondos Europeos, tamén se atopa o novo silo para vehículos a construír en Bouzas. Incidiu na "importancia da colaboración entre institucións, porque é imprescindible para que avancemos en proxectos como o novo paseo de Beirmar".
