O Concello cederá solo a Apamp para a construción do seu centro de día
O alcalde mantivo un encontro este venres con Daniel Varela, presidente, e con Concepción Somoza, xerente da Asociación de Familias de persoas con parálise cerebral no que comprometeu o apoio municipal ante esta necesidade.
No transcurso da reunión, Apamp trasladoulle a Abel Caballero a necesidade de contar cun centro de día na zona de Navia, onde xa dispoñen de instalacións propias, polo que lle demandaron solo dotacional para destinar a este fin.
O rexedor comprometeuse a achegar solo a Apamp para que edifique o seu centro de día destinado aos usuarios da entidade. “Seguiremos cooperando con Apamp polo traballo tan excepcional que fan e imos dispoñer do solo para cedelo nunha concesión”, sinalou, co fin de que poidan edificar o centro de día e así “seguir dando atención ás persoas que o precisan”.
