O alcalde sinala o Cumio de Viana como o “impulso” á saída sur ferroviaria de Vigo
O alcalde, que participou no Cumio Hispano-Portugués celebrado en Viana do Castelo, cualifica de “gran éxito” os avances na futura liña de alta velocidade Vigo-Porto e apunta aos “feitos concretos” co Ministerio de Transportes, que anunciou a “inmediata licitación do estudo informativo da saída sur ferroviaria de Vigo”.
Abel Caballero manifestou en rolda de prensa a súa satisfacción polos compromisos do Goberno de España e Goberno de Portugal no tema da saída sur ferroviaria de Vigo e a alta velocidade entre Vigo e Porto.
O rexedor, que estivo presente no cumio celebrado en Viana o pasado venres, puxo de manifesto os “feitos concretos”, co anuncio da Ministra de Transportes, Raquel Sánchez, da “inmediata licitación do estudo informativo da saída sur ferroviaria de Vigo”.
Caballero lembrou que foi o goberno de Pedro Sánchez quen retomou os proxectos de tren en alta velocidade para Vigo e lamentou que o Partido Popular quixera illar á cidade. “Levamos traballando desde que Sánchez chegou á Moncloa, xa cun estudo de alternativas feito para a saída sur ferroviaria e o estudo hidroxeolóxico para a liña de alta velocidade Vigo-Ourense por Cerdedo”.