O alcalde aborda o establecemento da enfermeira escolar co Colexio de Enfermería de Pontevedra
No encontro mantido este martes por Abel Caballero con Carlos Fernández Gómez, presidente, e Jorge Rouco, vogal do Colexio Oficial de Enfermería de Pontevedra, trataron a posibilidade de crear esta figura da enfermeira que sexa a profesional responsable de desenvolver os protocolos Covid-19 nos centros escolares.
Para Caballero esta “é unha idea a considerar. Sería bo que os centros dispuxeran dunha enfermeira para desenvolver as accións e protocolos Covid-19 e que tiveran o seu espazo para coordinar as actuacións”.
Segundo expuxo ante os medios de comunicación ao remate da reunión, a creación da figura da enfermeira escolar tería un “custo asumible e proporcionaría unha grande tranquilidade” porque nestes momentos a coordinación das cuestións relacionadas coa pandemia corresponde aos responsables dos centros de Atención Primaria que, na opinión do rexedor, “coa carga de traballo dos propios centros de saúde terán dificultades para atender as necesidades dos colexios”.
Así, avogou por establecer a figura da enfermeira escolar que atenda a un número determinado de centros, que poderían agruparse para a prestación deste servizo, para dar máis confianza e tranquilidade ás familias e ao profesorado.
Datos turismo
En rolda de prensa, Caballero deu conta dos datos relativos á ocupación hoteleira da cidade durante a primeira semana de setembro. Os hoteis de tres, catro e cinco estrelas rexistraron unha ocupación media do 42% e a media durante a fin de semana foi do 50%, chegando algúns establecementos de cinco estrelas ata o 54% de ocupación. O rexedor valorou positivamente estes datos, dado o contexto actual da pandemia, destacando que “Vigo somos un lugar de referencia, capaces de atraer un importante nivel de ocupación e o comportamento Covid está sendo moi bo en xeral”.