Escoitar

Inauguración da exposición "O Planeta da Igualdade" no Verbum

Lucía Molares, concelleira delegada da Mancomunidade da Área Intermunicipal de Vigo para o Proxecto Conta con Elas, inaugurou hoxe a exposición O planeta da igualdade" nos cubos "M" e "LL" no museo Verbum-Casa das Palabras. Esta exposición ponse en marcha coa colaboración da Concellería da Muller do Concello de Vigo.

martes, 13 mar 2007
O Planeta da Igualdade concíbese como un espazo interactivo onde as rapazas e rapaces dos colexios de Vigo aprenderán xogando cal é o significado que ten a igualdade entre mulleres e homes nos distintos ámbitos da nosa sociedade.

Esta exposición interactiva busca que a reflexión sobre as diferentes funcións asignadas tradicionalmente aos homes e ás mulleres e romper con estereotipos.

Por iso están a disposición das persoas que a visiten diversos xogos dirixidos aos nenos e nenas, ás nais e aos pais, ao profesorado, ao empresariado e en xeral a todas e todos, cos cales poden divertirse e tamén formarse nun novo concepto da igualdade real entre mulleres e homes.

O Proxecto Conta con Elas enmárcase dentro da iniciativa Equal do Fondo Social Europeo, dedicada a promover novos métodos de loita contra toda clase de discriminación e desigualdade no acceso a un mercado de traballo aberto a todos e todas, a través da sensibilización en materia de igualdade de oportunidades entre homes e mulleres para corrixir a segregación horizontal e vertical no eido laboral. O orzamento do proxecto, preto dos tres millóns de euros, é un dos máis altos de España.