Vigo seguirá reclamando a celebración dos exames MIR na cidade
Abel Caballero explicou que a conselleira de Saúde de Extremadura mostrou a súa desconformidade coa retirada de Cáceres, e logrou reincorporala, mentres que a Xunta de Galicia “non defendeu a Vigo, quedou calado porque está encantado con que sexan todos en Santiago”
- “Non vou parar ata que se restitúan os exames do MIR, e similares, en Vigo”, avanzou esta mañá o alcalde, que recordou que xa demandou en sendas misivas a recuperación deses exames o 24 de xullo, o mesmo día “que tivemos coñecemento desa decisión a través dos medios de comunicación”. A decisión de eliminar Vigo como sede dos exames MIR, PIR, EIR, FIR, QUIR, BIR e RFIR, tomouse nunha reunión entre o Ministerio de Sanidade e as comunidades autónomas o pasado 17 de xullo.
Abel Caballero recalcou que “resulta sorprendente” que o conselleiro de Sanidade, Gómez Caamaño, non mostrase publicamente a súa desconformidade coa decisión ata o de agora. Cáceres, tamén excluída da lista inicial acordada, recuperou a sede pola petición formal presentada o mesmo día 17 de xullo pola conselleira de Saúde e Servizos Sociais no pleno da Comisión de Recursos Humanos do Sistema Nacional de Saúde, mentres o conselleiro da Xunta “non defendeu a Vigo, quedou calado porque está encantado con que sexan todos en Santiago”.
O alcalde avanzou que demandará a devolución da sede a Vigo con mocións no Congreso, o Senado, a Deputación de Pontevedra e no Pleno do Concello de Vigo. Finalizou recordando que tamén “continuarei reclamando a Facultade de Medicina para a Universidade de Vigo”.