O goberno municipal organiza encontros didácticos entre escritores e escolares
Na iniciativa participarán o vindeiro curso escritores de “primeira dimensión” da cidade como Ledicia Costas, María Oruña, José Ángel Gómez “Defreds”, Antonio García Teijeiro e Francisco Castro.
O programa didáctico “Encontro con Escritores/as” poñerase en marcha o vindeiro curso, dirixido a alumnado de 5º e 6º de Primaria e de toda a Educación Secundaria Obrigatoria, uns 6.000 estudantes, co obxectivo de que teñan a oportunidade de coñecer o proceso literario da escrita.
Tal e como sinalou o alcalde, o Concello quere que as nenas e nenos da cidade saiban “o que é escribir, que coñezan a lectura, que falen cos escritores, que vexan como ilustra a lectura. As mellores escritoras e escritores da cidade ao servizo da educación Primaria e Secundaria” da man do Concello.
María Oruña, Antonio García Teijeiro, Ledicia Costas, Francisco Castro e José Ángel Gómez Iglesias “Defreds” realizarán 6 encontros nos centros de ensino da cidade, que servirán para incentivar e fomentar o hábito lector do alumnado, facilitar o seu discurso oral e escrito, propiciar o acceso ao coñecemento e a cultura e estimular a conciencia crítica.