O alcalde inaugura a nova oficina de Turismo en López de Neira
“O enorme auxe do turismo na cidade requiría este cambio para atender mellor aos visitantes”, destaca.
Abel Caballero inaugurou esta mañá a nova oficina de Turismo da cidade, que está situada na rúa López de Neira 8, moi preto da peonil rúa Príncipe.
A oficina, de grandes dimensións e dotada con pantallas táctiles e toda a información sobre as posibilidades que ofrece a cidade á disposición do turista, substitúe á que estaba anteriormente na estación marítima. “O enorme auxe do turismo en Vigo nos últimos oito anos, que alzou á cidade como un dos principais destinos de España, requiría este cambio de localización, no corazón da cidade”, advertiu.
O rexedor xustifica ademais este cambio ao feito de que “o turismo hai anos en Vigo estaba moi ligado aos cruceiros, pero agora abarca toda a cidade e todas as estacións do ano. A nova oficina supón, ademais, un aforro anual de 50.000 euros”, asegurou.
Con esta nova oficina o alcalde espera satisfacer todas as necesidades dos visitantes que, “a pesar de internet e as redes sociais, seguen preferindo a atención personalizada que se ofrece nunha oficina de turismo”.
Datos de turismo
A ocupación media dos fins de semana de xullo e agosto supera o 90%, cunha ocupación media do 80% no total dos días, con previsión de mellorar cando remate o mes.
