Vigo bateu en xullo o seu récord histórico de pernoctacións de turistas españois
As 76.011 estancias superan o dato de xullo de 2019 e representa a cifra máis elevada desde que hai rexistros do Instituto Nacional de Estatística (INE). En datos globais, tanto as noites como os visitantes do pasado mes aproxímanse á etapa previa ao Covid, o que sinala “a recuperación do turismo” na cidade, “importantísimo” para a economía, valorou Caballero.
“Os datos son magníficos” e apuntan á “recuperación total do turismo na cidade de Vigo”, advertiu o alcalde este martes, números que emprazan a Vigo “practicamente na senda do ano 2019”, antes da irrupción da pandemia, o “mellor ano turístico da historia da cidade”.
O turista nacional está a apostar especialmente pola cidade. Este ano, as súas estadías nos hostais e hoteis de Vigo romperon os rexistros históricos do Instituto Nacional de Estatística nun mes de xullo, superando as 76.000. Ata o de agora, o tope marcábao as 75.000 reservas do 2019.
O INE fixo pública este martes a estatística correspondente a xullo. Vigo acolleu máis de 38.000 visitantes no sétimo mes do ano, case que o dobre do pasado 2020 (cerca de 21.000) e preto dos 43.000 rexistrados no 2019. Ademais, o alcalde puxo énfase no dato hoteleiro, con máis incidencia na economía, que deixou máis de 91.000 pernoctacións na cidade, polas 49.000 do 2020 e as 103.000 rexistradas en xullo de hai dous anos.
O alcalde ofreceu en rolda de prensa outros datos de interese que deixa a publicación do INE do pasado mes. A estadía media dos turistas en Vigo foi de 2,37 días, mentres que a ocupación hoteleira media rexistrada ascendeu ao 74%.