Os municipios recibirán 1.500 millóns de euros de fondos europeos para proxectos de mobilidade
Abel Caballero amosou a súa “satisfacción” polo compromiso trasladado este xoves polo secretario de Estado de Transporte, Mobilidade e Axenda Urbana no transcurso dunha reunión mantida coa FEMP. Pedro Saura avanzou que os proxectos municipais que opten aos fondos europeos Next Generation poderán presentarse a comezos deste verán, en canto se publique a Orde Ministerial que regula as subvencións.
Os Concellos recibirán 1.500 millóns de euros procedentes de Fondos Next Generation EU para realizar os seus proxectos de mobilidade urbana e metropolitana, unha cifra que, en palabras de Abel Caballero, “é unha moi boa noticia para os concellos de España” que, ademais, “ten en conta que a maior parte das competencias de mobilidade recaen nas entidades locais”.
Así o manifestou esta mañá no transcurso da reunión telemática mantida co secretario de Estado de Transportes, Mobilidade e Axenda Urbana, Pedro Saura, no que se detallaron os contidos dunha próxima Orde Ministerial na que quedarán recollidas as bases reguladoras desta subvención. Tras a publicación da norma, prevista para o mes de xuño, abriríase o prazo para a presentación dos proxectos municipais. Neste sentido, o alcalde referiuse á celeridade e destacou que os municipios xa están listos para presentar proxectos “maduros, anticíclicos, transformadores e de aplicación inmediata”, destinados a acelerar a implantación de zonas de baixas emisións, transformar o transporte público cara a modelos máis sostibles, priorizar o transporte colectivo e impulsar a dixitalización da actividade dos servizos públicos de transporte.
A subvención de 1.500 millóns de euros distribuirase en dúas convocatorias de 750 millóns, unha para 2021 e outra para 2022, e os beneficiarios serán os municipios con máis de 50.000 habitantes, as capitais de provincia, agrupacións de concellos e os municipios maiores de 20.000 habitantes de dereito nos que concorran simultaneamente determinadas características. A xuízo de Caballero, asegúrase a distribución territorial en todo o espazo, “sen que haxa grandes asignacións a uns en detrimento de outros, o que asegura unha distribución homoxénea en termos poboacionais, que nos parece adecuada”.
No encontro marcouse tamén un calendario de traballo cunha primeira cita o próximo 11 de maio, data na que está previsto un seminario por vía telemática para dar a coñecer aos técnicos municipais cuestións administrativas relacionadas con estes proxectos e subvencións. Finalmente, no transcurso da reunión, o secretario de Estado de Transportes, Movilidad e Axenda Urbana, Pedro Saura, anunciou que sobre o Fondo de Transportes COVID-19 para compensar as perdas producidas pola pandemia, as transferencias ás Entidades Locais afectadas realizaranse ao longo do mes de xuño.