O alcalde erixe aos concellos en “aliados” do turismo e avoga por adiantarse á demanda

No Hotel Meliá Castilla da capital de España, e tamén de forma telemática, celebrouse este xoves a xornada “Novos paradigmas competitivos nos destinos de sol e praia”, organizada por Exceltur con profesionais do sector, alcaldes e alcaldesas para a presentación dos resultados do informe Solytur no marco dos fondos Next Generation da Unión Europea. A clausura contou coa participación do presidente de Exceltur, Gabriel Escarrer, do alcalde e presidente da FEMP, Abel Caballero, e da ministra de Turismo, Reyes Maroto.

Na súa intervención, Abel Caballero recoñeceu que o turístico é “un sector económico central do que dependeu unha parte importante do desenvolvemento do noso país nos últimos corenta e cincuenta anos”, un ámbito que atravesou “crises profundas que navegou ben”, mais a provocada pola pandemia “é a máis dura, un golpe letal que dana ao turismo no corazón”.

O alcalde e presidente da Federación Española de Municipios e Provincias manifestou que, no actual contexto, “parte importante da acción política ten que ir dirixida a este sector” e felicitou ao Goberno de España polo adianto de 27.000 millóns de euros de fondos europeos que xa foron incorporados nos orzamentos do Estado. Para Caballero, dispor destas partidas “é un avance extraordinario e iso ten un mérito político”.

Abel Caballero trasladou aos profesionais do sector que “tedes grandes aliados” nos alcaldes e alcaldesas, cidades “tan ligadas” a un ámbito turístico que “entendemos tan ben”, e citou como exemplo o Nadal vigués que tan “extraordinariamente” funcionou. O turismo, engadiu, presenta “unha capacidade de futuro inimaxinable, porque estamos camiñando á sociedade de ocio”; asegurou que “o futuro vai ser aínda moito máis turismo, moita máis viaxe”, polo que considerou relevante fortalecelo: “A oferta ten que ir marcando a pauta das novas demandas”.