Escoitar

O alcalde reclama á Xunta o IES de Navia e máis vivenda en Vigo para atender a demanda

O alcalde esixe ao goberno autonómico que faga o instituto e lémbralle que se trata da zona de Galicia con maior poboación xove e que o Concello pon o terreo a disposición da Xunta. “Feijóo anunciou hoxe algo que vai tardar anos en facerse, pero cando leve gobernando 16 anos non terá feita ningunha vivenda en Navia”, sinalou.

martes, 17 nov 2020

O alcalde de Vigo, Abel Caballero, reclamou este martes ao presidente da Xunta de Galicia, Alberto Núñez Feijóo, que se comprometa a construír o Instituto de Educación Secundaria que reclaman os veciños do barrio de Navia. Aproveitando a visita do mandatario ao PAU, o rexedor lémbralle que se trata da zona de Galicia con maior poboación xove e que o Concello pon a disposición do Goberno galego os terreos necesarios.

“Non dixo o máis importante que tiña que dicir, que sería construír un instituto en Navia, porque é a zona de Galicia con máis poboación xove, e toda a dotación foi construída polo Concello”, sinalou antes de mencionar as instalacións deportivas, a escola infantil, zonas verdes e culturais.

Caballero tamén apuntou que existe unha gran demanda de vivenda de protección, por riba das 5.000 persoas inscritas. “Feijóo anunciou hoxe algo que vai tardar anos en facerse, e así, cando leve gobernando 16 anos non terá feita ningunha vivenda en Navia”, sinalou.

Río Lagares

Respecto da visita da conselleira Ethel Vázquez o pasado luns, o alcalde indicou que a Xunta non conta que as expropiacións correrían a conta do Concello, cunha cifra superior aos 2 millóns de euros, e que depende da aprobación do Plan Xeral. “O 1,2 millóns que din é unha cifra ridícula para o que se necesita na zona, o único certo é que o Concello vai investir 120.000 euros en limpar o Lagares, a Xunta cero euros”, indicou.

Caballero asegurou que o Goberno autonómico non quere aprobar o plan especial para o Lagares porque suporía que a propia Xunta asumira os gastos. “No documento que temos os investimentos dos que fala a Xunta redúcense a 600.000 euros”, engadiu.

Apertura do tráfico en Ronda de Don Bosco

Por outra banda, o alcalde informou que desde este luns está aberto un carril ao tráfico na rúa Ronda de Don Bosco, entre Blein Budiño e Velázquez Moreno, para axiliar a circulación durante os traballos de humanización da zona.