O Concello inicia a tramitación para desenvolver os ámbitos de Recaré e Cruceiro
A Xerencia de Urbanismo tomou coñecemento da incoación do procedemento para o desenvolvemento destes ámbitos de solo urbano non consolidado e uso terciario que suman máis de 147.000 metros cadrados.
O alcalde informou este martes do inicio da tramitación urbanística de dúas actuacións que se poderán desenvolverse ao abeiro do Plan Xeral de Ordenación Municipal.
A Xerencia de Urbanismo tomou coñecemento do inicio do procedemento para desenvolver o do ámbito non consolidado de Recaré – Ferreiras, un espazo cunha superficie de máis de 70.000 metros cadrados para uso terciario, é dicir, para uso comercial. Tal e como explicou Caballero, sitúase entre a autovía A-55 e os ámbitos de Cemeiras, Castiñeiras e Ferreiras, na zona de Baruxáns e ten capacidade para construír máis de 56.000 metros cadrados.
O ámbito de Recaré contempla un 20% de espazos de zonas verdes, que é superior ao establecido na Lei do Solo. A propietaria maioritaria do ámbito trasladou a súa vontade de iniciar esta tramitación urbanística para desenvolver o proxecto e o PXOM prevé que deberá desenvolverse no primeiro trienio.
Ademais, o rexedor deu conta do inicio do procedemento para desenvolver o ámbito de solo urbano non consolidado de Cruceiro, que ten unha superficie de 77.130 metros cadrados e uso comercial. Encádrase sobre territorio de Alcabre, Navia e Comesaña articulándose na contorna da Avenida de Europa. A propiedade ten a obriga de ceder solo para que o Concello desenvolva o parque lineal da Avenida de Europa en dirección Samil, constituíndo así un paseo similar ao da Avenida de Castelao, que chegará ata Samil.
A tramitación urbanística foi solicitada pola Comisión Xestora, constituída para o ámbito, que está formada por máis do 50% dos propietarios.
Prevención drogas
O goberno local aprobou o convenio coas entidades Alborada, Amaina e máis Érguete para o desenvolvemento do programa de prevención de drogodependencias e outras condutas aditivas para o ano 2025. Cun importe superior aos 100.000 euros, o obxectivo é cooperar con ONG,s que realizan programas de actuación preventivas en distintos ámbitos como o escolar, familiar, xuvenil, laboral ou comunitario. Caballero avogou por unha concienciación social “importantísma” sobre a importancia dos problemas, danos ou custos persoais e sociais relacionados coas drogas.