O goberno municipal inviste 1,2 millóns de euros na humanización de Hispanidade, que inclúe un ascensor coa rúa Romil
A Xunta de Goberno Local deu luz verde tamén este xoves á construción das tres rampla mecánicas que comunicarán a contorna do Colexio Losada con Ramón Nieto e á humanización de Pablo Iglesias por un importe de 1,2 millóns de euros.
O alcalde informou da construción do ascensor desde Romil a Hispanidade e a humanización de Avenida Hispanidade entre as rúas Amor Ruibal e Feliciano Rolán, que teñen un importe de 1.271.209 euros, dos que 945.000 euros son achegados polo Goberno de España procedentes de Fondos Europeos Next Generation da UE.
A actuación comprende 170 metros de lonxitude nos que se instalarán novos pavimentos, novas beirarrúas, a renovación das redes de saneamento, abastecemento e pluviais; as canalizacións dos servizos para soterrar a iluminación pública e semáforos; nova sinalización, novas redes de rega, novo mobiliario urbano, luminarias, xardinería vexetal e arbórea e elementos decorativos, amais de instalar un punto de recarga autónoma para vehículos.
O ascensor erguerase de xeito paralelo, logo da demolición da escaleira que comunica Hispanidade con Romil. Será un ascensor panorámico para 13 persoas e ademais, haberá unha escaleira tradicional comunicando as rúas.
Con esta actuación, o goberno municipal segue completando o corredor vertical mecánico que conectará Beiramar e Hispanidade. O corredor iníciase no Auditorio Mar de Vigo, segue por Hispanidade, continúa co ascensor de Marqués de Valterra a Torrecedeira, o que conecta Torrecedeira e Pi y Margall, o de Pi y Margall a Camelias, o que vai de Camelias a Romil e o que conecta Romil e Hispanidade.
Rampla na contorna do Colexio Losada
A Xunta de Goberno aprobou tamén a construción das ramplas mecánicas que conectarán Ramón Nieto coa contorna do Colexio Losada por un importe de 2.305.531 euros. Serán tres ramplas mecánicas cunha lonxitude total de 98 metros para salvar unha diferenza de cota de 18 metros. As dúas primeiras ramplas comunican a rúa dous Curros con Ernesto Lecuona, e a terceira rampla disponse pola marxe esquerda da rúa José Franco Montes. Levará unha estrutura de cubrición formada por pórticos metálicos e vidro laminado, similar á de Gran Vía.
O goberno de España achega 1.647.458 euros de Fondos Next Generation UE para este proxecto.
Humanización Pablo Iglesias
Ademais, quedou aprobada por 1.288.000 euros a humanización da rúa Pablo Iglesias. O rexedor explicou que a renovación deste viario corresponde á marxe dereita desde o principio ata a confluencia co Alexandre Bóveda. “Haberá ampliación e renovación das beirarrúas, mantense as prazas de aparcamento, novas redes de saneamento e abastecemento, luces led, xardinería e novo mobiliario urbano con papeleiras e bancos”, explicou Caballero este xoves.
