“Turandot” segunda cita coa ópera este verán en Castrelos
Abel Caballero desvelou hoxe que o 9 de agosto a cidade acollerá esta ópera en tres actos con música de Giacomo Puccini.
“Compráceme sobremaneira anunciar a segunda ópera deste verán en Castrelos”, indicou Caballero, desvelando que se trata de “Turandot”, unha das “óperas máis famosas e espectaculares de todos os tempos”.
“Turandot” é unha ópera en tres actos con música de Giacomo Puccini baseado na obra teatral Turandotte de Carlo Gozzi. Quedou inconclusa pola morte de Puccini e foi completada por Franco Alfano e estreada o 25 de abril de 1926 na Scala de Milán. Chegará a Castrelos cun elenco de máis de 70 artistas, cunha rechamante posta en escena e coa participación da Ópera Nacional de Moldavia.
A obra está ambientada no salvaxismo da antiga China e narra a historia da bela e cruel princesa chinesa Turandot, que esixe aos seus pretendentes que respondan a tres enigmas se queren casar con ela; en caso de non logralo, morrerán. Calaf, un príncipe estranxeiro que oculta o seu nome, acepta o reto e resolve os tres enigmas.
Será a segunda ópera do verán xunto a “La Traviata”, o 1 de agosto, e súmase á programación de verán en Castrelos:
- Ana Belén – 12 de xullo
- Gente de Zona – 17 de xullo
- Trueno – 18 de xullo
- Rozalén – 24 de xullo
- Vanesa Martín – 31 de xullo
- Ópera La Traviata – 1 de agosto
- Jason Derulo – 8 de agosto
- Ópera Turandot – 9 de agosto
- UB feat. Ali Campbell – 15 de agosto
- India Martínez – 16 de agosto