Escoitar

O goberno de Vigo aproba o convenio publicitario con Volotea, que operará en Peinador desde xuño

Caballero indicou que a baixo coste iniciará a súa andaina en Vigo desde o 2 de xuño e operará as rutas entre Peinador e Palma, Valencia e Ibiza, cos billetes xa á venda. O convenio, que ascende a 726.000 euros en tres anos, céntrase na promoción turística da cidade.

xoves, 26 dec 2013
O pasado luns, 23 de decembro, o goberno local aprobou o convenio publicitario con Volotea, que garante, con axudas económicas decrecentes, a presenza da baixo coste en Peinador durante os próximos tres anos.

Segundo informou este xoves Abel Caballero, o acordo ascende a 726.000 euros, que se inician cos 363.000 euros deste ano para concluir con 242.000 euros no próximo e 121.000 euros no 2015. Volotea operará a conexión de Peinador con Palma, Valencia e Ibiza desde o próximo 2 de xuño e durante os próximos tres anos.

A finalidade do convenio é promocionar Vigo como destino turístico mediante accións como o rotulado dun avión cun eslogan da cidade, voces promocionais a bordo dos aeroplanos e o uso das redes sociais e da web da compañía para promocionar Vigo.