Escoitar

Inauguradas as Unidades Básicas de Acción Social de Teis e Travesía

As Unidades Básicas de Acción Social de Teis e Travesía, reunidas nun local sito na rúa Dr. Corbal, 21, foron inauguradas este venres pola concelleira de Benestar Social, Marta Iglesias. O novo centro, que supuxo un investimento municipal de 190.000 euros, vénse sumar aos outros nove existentes no resto de Vigo.

venres, 8 xuñ 2007
1181309566centroteis080607.jpg
As Unidades Básicas de Acción Social (UBAS) son centros de atención primaria e información xeral sobre recursos e prestacións sociais. Os traballadores sociais do Concello que desempeñan o seu labor neles son os que realizan o primeiro contacto con problemáticas como a social, a familiar, de infancia e de atención ás persoas maiores e ás persoas discapacitadas dentro de cada zona concreta. Así, os usuarios das UBAS poden ser derivados a outros servizos e programas especificamente destinados a cubrir as súas necesidades.

O local que acolle as UBAS de Teis e Travesía, un baixo situado na rúa Dr. Corbal, 21, foi inaugurado este venres despois das obras de acondicionamento que se realizaron nos meses de marzo, abril e maio. O baixo, que anteriormente non tiña ningún uso, foi cedido por Urbanismo e acondicionado mediante unha dotación orzamentaria de 190.000 euros.

O centro é unha continuación do que xa tiña Teis, e agora abranguerá tamén a área de Travesía. Xuntos, os dous barrios soman aproximadamente 46.000 habitantes. A nova UBAS contará con dous traballadores sociais, dous auxiliares e un conserxe.

En Vigo hai outras nove UBAS. Son as da zona Sur (Bembrive, Beade, Sárdoma, A Salgueira e Teixeiro), Castrelos, Litoral (zona de praias con Matamá), Coia, Casco Vello, Centro, O Castro, Rivera Atienza e Lavadores.
1181309566centroteis080607.jpg
1181309592centroteis080607b.jpg
Descargar todas as imaxes