Vigo continúa sendo “a cidade de España con máis bandeiras azuis”

Vigo pedía 12 bandeiras azuis e concédenselle as 12 bandeiras azuis” explicou o rexedor ao dar conta do listado de distincións confirmado este martes. Os areais que contan con bandeira azul son: Argazada (correspondente co novo paseo de Samil e a recuperación dunar); Fontaiña; A Punta; Rodas (nas Illas Cíes); Canido; Carril; O Adro; Fortiñón; Mende; O Vao; Santa Baia e Tombo do Gato. "Somos a cidade de España con máis bandeiras azuis”, salientou. 

Ademais, o rexedor citou os 14 sendeiros azuis outorgados pola Asociación de Educación Ambiental e do Consumidor (ADEAC), que converten a Vigo na cidade española co maior número de Sendeiros Azuis municipais. O listado integrado polos cinco sendeiros de Camiño a Beiramar, Senda de riberia do Río Lagares, Senda entre Faros, Senda litoral do Monte da Guía e Vía Verde de Vigo, crece cos nove anunciados hoxe: Candeán, Cabral, Bembrive-Beade, Coruxo, Matamá-Comesaña, Oia, Saiáns, Valladares e Zamáns. Así, apuntou, “somos un modelo de bandeiras e sendeiros azuis e seguimos traballando polo medio ambiente con praias e sendeiros marabillosos”.

Ocupación hoteleira

Abel Caballero tamén sinalou que Vigo rexistrou “un nivel de ocupación hoteleira extraordinario no mes de abril, situándose no 68,88%”. A cifra supón un 26,7% máis que no mesmo mes do ano pasado, “converténdose no mellor abril da historia en termos turísticos para a cidade”.

En canto á procedencia, o 12,8% dos visitantes viñeron do resto de Galicia, o 42% do resto de España e o 45% son internacionais, dos que destaca Portugal (con case o 29%); un 12% proceden dos Estados Unidos e un 10% de Alemaña, entre outros. O alcalde apuntou que “Vigo consolidouse como unha cidade intensamente turística”, converténdose “na primeira de Galicia”.