Vigo destina máis de 28 millóns de euros á política social en 2026, un 18% máis que o ano anterior

O alcalde presentou o orzamento municipal de política social para o ano 2026, que ascende a máis de 28 millóns de euros, o que supón un incremento de 4,3 millóns respecto ao exercicio anterior. “A dedicación do Concello de Vigo á política social sobe un 18%, demostrando unha vez máis que esta cidade é líder en atención ás persoas”, explicou

Entre as principais partidas, destacan os 15,3 millóns de euros destinados ao Servizo de Axuda no Fogar (SAF), así como 1,76 millóns para o Centro Cedro. As axudas de emerxencia municipal contarán cunha asignación inicial de 1,3 millóns de euros, “aínda que sen límite orzamentario, porque en Vigo atendemos a toda a xente que o necesita”, explicou Caballero.

As becas de comedor escolar, cun orzamento de 2,5 millóns de euros, tamén se conceden sen límite, “malia ser competencia da Xunta, que non as paga; faino o Concello de Vigo”, lembrou o alcalde. Amais, o Concello dedica 1.053.000 euros ao albergue municipal, “única cidade de Galicia que ten este servizo”.

Como novidade, Caballero anunciou a posta en marcha de Vigo Social TV, cun orzamento de 469.300 euros, un proxecto innovador de comunicación social e información cidadá para persoas maiores. Outros programas relevantes son o socioeducativo (829.288 euros), o de coidadores de barrio (611.000 euros), e as actuacións vinculadas a “Vigo, cidade amiga das persoas maiores”, cunha partida de 313.000 euros centrada na loita contra a soidade non desexada. Ademais, o Concello destinará 350.000 euros á cofinanciación de centros de día en Teis, Coia e Valadares.

O programa Vigo Inclusivo contará con 90.000 euros, mentres que a teleasistencia municipal, gratuíta para a cidadanía, disporá de 192.000 euros. O servizo Xantar na Casa, que leva comida a persoas con necesidades especiais, ascende a 168.000 euros.
Ademais, os convenios con entidades sociais suman 571.448 euros e os comedores sociais recibirán 471.685 euros

Orzamento da Xunta de Galicia

Caballero aproveitou a presentación para criticar a política social da Xunta, denunciando que “tras declarar incompatible a RISGA co Ingreso Mínimo Vital, deixaron a moita xente sen axuda autonómica, e agora reducen no orzamento a asignación da RISGA en 24 millóns de euros. É un escándalo”.

O alcalde tamén cualificou de “déficit dramático” a falta de prazas residenciais públicas para persoas maiores en Vigo, lembrando que “é unha competencia exclusiva da Xunta e que destina 0 euros a este fin”. Engadiu que a única nova residencia prevista “será na ETEA e será financiada por unha fundación privada”.

Por último, destacou o compromiso municipal coa entidade AFAN, á que o Concello achega 65.000 euros anuais, fronte aos 15.000 euros que lle debe a Xunta.