O alcalde presenta a "mellor" Gran Gala do Deporte organizada en Vigo, con récord de candidaturas
A “XXVI Gran Gala do Deporte de Vigo”, programada para o vindeiro xoves 3 de abril no Teatro A Fundación, será “a mellor que se fixo na cidade”, segundo anticipou hoxe o alcalde ao presentar unha edición que bate récord de presentación de candidaturas con 79 nomeados.
Abel Caballero presentou este luns, coa primeira tenente de alcaldía, Carmela Silva, o concelleiro de Deportes, Manel Fernández, así como con Juan Carlos Dasilva, director xeral de Prensa Ibérica en Galicia; Pedro Costa, director comercial de Faro de Vigo e Walter Álvarez, director territorial de Abanca, a vixésimo sexta edición da Gran Gala do Deporte de Vigo onde se recoñecerá aos mellores deportistas de 2024, femininos e masculinos absolutos, e ás mellores promesas sub 19. “É para celebrar a importancia do deporte en Vigo”, recalcou o rexedor ao expoñer a celebración do día 3 de abril.
O alcalde lembrou que entre os galardóns atópase o "Premio Luis Miró”, instituído en 2021 para premiar e recoñecer a traxectoria deportiva, e as 16 mencións especiais para deportistas olímpicos y paralímpicos.
Candidaturas
A vixésimo sexta edición conta con 79 candidaturas, das que 43 son de deportistas na categoría absoluta e 36 de promesas.
Caballero incidiu na vertente deportiva da cidade. “Vigo é unha cidade moi do deporte. Nós somos cidade de economía e do deporte que transversaliza a cidade pola forma de practicalo e pola vocación de desenvolver infraestruturas”, asegurou ao lembrar que está en construción a nova Bancada de Gol do estadio de Balaídos, ademais de pavillóns deportivos, campos de fútbol, espazos deportivos”.
O rexedor recalcou que o novo Plan Xeral de Ordenación Municipal colocará as infraestruturas deportivas “no nivel que demanda a cidade”.
O director comercial de Faro de Vigo agradeceu a colaboración do Concello e de Abanca para a "Gran Gala do Deporte de Vigo".