O alcalde convida ao mundo do cinema e do audiovisual a aproveitar Vigo como escenario de rodaxes

Abel Caballero acentuou hoxe, ante os participantes na presentación de “Vigo, o plató das mil historias” en el auditorio de Fitur Screenen Fitur da Vigo Film Office, a vocación da cidade polo cinema, “porque somos cinema, imaxe, guión, luz, cor, música, actores e actrices, e, por tanto, somos cinema”.

O alcalde incidiu en que a cidade quere “xogar o papel do cinema” pola súa repercusión no cambio de cultura da humanidade. “O cinema impregna a cultura e a cidade non quere quedar fóra disto. Queremos formar parte desta gran revolución cultural e que está a ocupar todos os espazos”, afirmou.

O potencial de innumerables espazos da cidade como escenario para calquera produción audiovisual foi destacado este xoves por Caballero ao recalcar a forza de contornas como as Illas Cíes, coa mellor praia do mundo, o paseo de Samil, ETEA, ou calquera rúa ou barrio. “É este gran Vigo, no que hai de todo o que necesita calquera director ou directora dunha película”.

A rodaxe do anuncio de Nadal de 2024 nunha céntrica rúa de Vigo, así como de 50 producións, foron postos en valor polo rexedor ante os protagonistas do audiovisual hoxe en Madrid. Caballero destacou o atractivo singular da luz natural de Vigo, determinou aos mellores pintores galegos a asentar os seus estudos na cidade.

Vigo Film Office

A directora de Vigo Film Office, Amaia Mauleón, explicou que as máis de 50 rodaxes realizadas o ano pasado poñen en evidencia a transformación da cidade e que “Vigo converteuse en algo máis que nun estudio: un lugar onde as historias cobran vida”.

“Vigo converteuse nunha cidade amigable co cinema. Recibimos con entusiasmo ás producións que veñen e dámoslles un trato amable e personalizado tanto por parte do Concello como da cidadanía en xeral”, afirmou Mauleón ao recalcar a importancia de que os profesionais conclúan o seu traballo cun bo balance e transmitan as súas boas valoracións ao resto de compañeiros do sector.

Mauleón destacou as catro películas rodadas en 2024: “Romaría”, de Carla Simón; “San Simón” de Miguel Ángel Delgado; “Rondallas” de Daniel Sánchez e “As liñas descontinuas” de Anxos Fazáns, así como os anuncios da Loterías do Estado e da Mutua Madrileña. Cada unha das producións serven, tamén para actualizar os roteiros cinematográficos da cidade “coas que o turista descobre a cidade dunha forma diferente”, recalcou.

Tras lembrar a longa listaxe de actividades desenvolvidas pola Vigo Film Office, Amaia Mauleón, sinalou que “o camiño continúa porque con cada iniciativa reafirmamos o noso compromiso co cinema e a nosa capacidade para atraer talento e proxectar a cidade ao mundo”.

Cosmopolita

Antonio Durán, “Morris”, destacou o carácter cosmopolita de Vigo como de cidade “que está chea de historias moi puxantes” e que non só vale como estudio para facer cinema, senón para facer literatura. O actor desvelou que o director de “Los lunes al sol”, Fernando León de Aranoa, quedou “namorado” de Vigo tras rodar a premiada longametraxe e que en ocasións regresa para contemplar as súas rúas e paisaxes.

“Vigo é unha cidade especial”, recalcou Morris ao apuntar a intensa vida cultural da urbe e que, persoalmente, “necesita volver a Vigo para recargar pilas”.

Morris dirixiuse ao alcalde para asegurar que “conseguiu poñer á cidade no mundo a todos os niveis, tanto no relativo ao cinema, como de eventos, ou o Nadal, e creo que co apoio que seguirá ofrecendo aos creadores seguiremos crecendo”.

Asamblea Spain Film Commission

Juan Manuel Guimeráns, presidente da Spain Film Commission, que recoñeceu ser "fillo de vigués", subliñou que o alcalde "non esaxerou nada". "Mesmo se quedou curto", chanceou, recalcando as características de VIGO para acoller rodaxes.

Guimeráns Ademais anunciou que a asemblea anual da asociación, con 47 socios, celebrarase en maio en Vigo.