O rexedor valora a capacidade de “internacionalización” do programa ViaExterior de Zona Franca

A sede de Zona Franca acolleu este venres o acto de ingreso da sexta edición da aceleradora multisectorial ViaExterior que ten como obxectivo promover e aumentar a probabilidade de éxito na internacionalización das compañías galegas. Acceden agora 20 novas empresas de Pontevedra, A Coruña e Ourense que permanecerán no programa formativo ata xuño de 2024.

Abel Caballero, presidente de Zona Franca, deu inicio á xornada valorando ViaExterior como “a nosa forma de seguir coa internacionalización e de potenciar a nosa capacidade” poñendo en valor o programa do que xa se beneficiaron 120 compañías galegas, das que o 90% acadaron presenza polo menos nun novo mercado a través de exportacións directas, novos axentes ou distribuidores en destino.

A Zona Franca pon á disposición das empresas do programa ViaExterior un equipo especializado en comercio exterior integrado por máis de 30 profesionais de diferentes áreas. O 25% das empresas que ingresan na aceleradora pertencen ao sector téxtil-moda, un 15% ao agroalimentario, un 15% ao tecnolóxico e o restante 45% aos ámbitos industrial, educativo, madeira, pedra natural, electricidade e camperización.

As 20 empresas son as que seguen: Asenjo Montenegro Vigo Soluciones, S. L. (AMV Soluciones), Auxiliar de Sistemas Marc, S. L. U. (AUSIMA), Cachanpesca, S. L., Centro Lingoreta, S. L., Chess Excelsior España, S. L., Chill&Buy S. L., Cíclope Camper C.B., Eva Castro Baby, S. L. U., Fio Textil, S. L., Galoha, Industrias Guerra, S. A., Industrias Neves de Diseño, S. L., Ingeniería y Montajes Rías Bajas, S. A., José Fernández Piñeiro, S. L., Kelltia Natural Stones, Letsgonotes, S. L. U., Maderas Pérez Giménez, S. L., Quival, S. A. (El Nogal), Sequentur, S. L. y Silvavi, S. L.

Apoio ao emprendemento e á internacionalización

O compromiso co emprendemento e os axentes do ecosistema da súa área de influencia é unha das grandes liñas de actuación do Consorcio da Zona Franca de Vigo. Os programas de incubación e aceleración de startups e pemes sectoriais conforman unha oferta única na que se poñen ao dispor do talento recursos para que cada proxecto se convirta nun caso de éxito.

Ata 8 programas verticais de aceleración desenvólvense, en diferentes fases, baixo o paraugas do Consorcio. ViaGalicia, ViaTextil, Business Factory Auto (BFAuto), High Tech Auto (HTA) son os programas que concentran o traballo vertical nos distintos sectores de referencia. ViaExterior, Vino Exterior, Mar Exterior e Cultura Exterior son os programas especificamente deseñados para exportar o talento e as solucións desenvolvidas ao mercado global.

Ademais, Zona Franca dispón doutros programas de apoio ás empresas como os Mércores de Internacionalización, xornadas abertas a todas as pemes nas que se explican as oportunidades de negocio en mercados específicos, feiras, estratexias e promoción internacional. Tamén conta cun portal formativo, VideoExterior, a través do cal as empresas poden descubrir novas experiencias de internacionalización mediante recursos de carácter audiovisual.