O Concello aumenta a subvención a FOANPAS en máis de 36.000 euros para paliar o aumento do prezo dos comedores escolares

A Xunta de Goberno deu luz esta mañá a unha addenda ao convenio asinado con FOANPAS para a redución do prezo do menú na rede de comedores escolares xestionados pola Federación Olívica de Asociacións de nais e pais. Deste xeito, auméntase en 36.366 euros o montante recollido no acordo de 606.000 euros aprobado recentemente.

Estes 643.000 euros súmanse ao 1.427.589 euros da convocatoria municipal de bolsas de comedor que está aberta ata o 30 de xuño. Neste caso, a contía da bolsa, pasa este ano de 41 a 45 euros ao mes.

Outro dos asuntos que avanzou o rexedor foi a aprobación da renovación da rede de abastecemento da avenida de Castrelos, entre o número 120 e o 144. Esta actuación incluirá a renovación do saneamento, abastecemento e beirarrúas. O volume de inversión é de 150.700 euros

Xuventude

O goberno local deu luz verde á solicitude ao Goberno de España de 450.000 euros para o desenvolvemento do programa “Lecer Alternativo” de prevención de consumos aditivos en menores. Deste montante, a achega do Goberno local é de 192.857 euros, tal e como explicou o rexedor.

Con esta iniciativa, organízanse distintas actividades para a mocidade de Vigo durante todo o ano co obxectivo de traballar hábitos saudables de hixiene, alimentación, igualdade de xénero, rexeitamento de drogas e outros valores como a solidarieade, a responsabilidade ou a participación. Tamén se reforzarán actividades promovidas por colectivos xuvenís como concertos, xogos de rol, monólogos ou xogos, entre outros. Finalmente, engadiu Caballero, desenvolveranse actividades divulgativas para dar a coñecer á mocidade a candidatura de Illas Cíes a Xeoparque Mundial da UNESCO.