Vigo reforza o transporte e a seguridade na noite de San Xoan
O alcalde detallou este xoves o dispositivo habilitado para a noite más curta do ano, con 41 axentes da Policía Local para velar pola seguridade e un incremento das frecuencias do autobús urbano vigués. Caballero recordou que está “completamente prohibido” calquera tipo de lume nas praias.
O Concello de Vigo inspeccionou e autorizou a realización de vinte dúas cacharelas nesta noite de San Xoan e o alcalde recordou á cidadanía que “de ningún modo, ningunha fogueira por pequena que sexa na praia”, xa que está “completamente prohibido”.
Para velar pola seguridade na noite de San Xoan, o Concello dispón a 41 efectivos da Policía Local, segundo avanzou o alcalde. Trátase de persoal de Atestados, da unidade de Costa e Praia e tamén axentes motorizados para poder chegar ás zonas da cidade con menor accesibilidade.
Por outra banda, Vigo tamén mellora o transporte público ante o previsible incremento dos desprazamentos, en particular da xente máis nova. Ao efecto, Abel Caballero recomendou á xuventude o uso do autobús e informou do reforzo da liña nocturna N1, que terá unha frecuencia de paso de 20 minutos en zonas como o centro, Coia, Bouzas ou Samil, e ademais prolonga o seu funcionamento ata as 07:30, hora da súa última saída desde Samil.
As liñas regulares a Samil tamén se verán reforzadas na tarde noite deste xoves. Explicou Caballero que, na parada dos Choróns, a frecuencia media dos autocares será de 17 minutos, coas liñas 15A, 15B e 15C; en Policarpo Sanz tamén será de 17 minutos coas rutas 10, 15B e 15C e na Praza de América, de 20 minutos coas liñas 10 e 15A. Toda a información sobre percorridos e horarios está dispoñible na web de Vitrasa en la app Vigo.