O novo ministro ratifica ante Abel Caballero o compromiso de construír unha biblioteca do Estado en Vigo
O alcalde mantivo este martes en Madrid unha entrevista co novo titular de Cultura, José Manuel Rodríguez Uribes, quen asumiu o compromiso adquirido polo anterior ministro de edificar unha biblioteca do Estado na cidade.
Abel Caballero desprazouse este martes a Madrid, onde mantivo unha reunión co novo ministro de Cultura e Deporte, José Manuel Rodríguez Uribes, con quen abordou cuestións relativas ás cidades españolas, na súa calidade de presidente da FEMP, e tamén da biblioteca do Estado para Vigo, como alcalde olívico.
“Co anterior ministro e neste Ministerio”, recordou Caballero ao remate da reunión, “acordaramos tacitamente un lugar [nos terreos municipais da rúa Lalín], estamos facendo a recualificación urbanística e queríamos o impulso do Goberno de España e do ministro de Cultura para lanzar este gran desenvolvemento cultural” para Vigo.
O alcalde engadiu que “Vigo está hoxe pendente desta entrevista e polo tanto de lanzar tamén este proxecto de biblioteca do Estado que xa está en marcha pero que necesita do impulso, da ratificación e do acordo co ministro do Goberno de España”. A este respecto, Rodríguez Uribes confirmou que continuará co proxecto: “Adianto que esta testemuña do ministro Guirao recólloa con gusto e polo tanto traballaremos nesa biblioteca estatal na cidade de Vigo”.
