O alcalde visita as ramplas mecánicas do Paseo de Granada
O Concello inviste 3,3 millóns de euros na humanización e instalación de catro ramplas mecánicas, dos que 2 millóns proceden do Plan de Recuperación do Goberno de España con fondos europeos Next Generation EU.
Abel Caballero visitou as obras de humanización e instalación de ramplas mecánicas no Paseo de Granada que xa están en funcionamento. A actuación conta cun investimento de 3.344.461 euros, dos que 2 millóns proceden do Plan de Recuperación do Goberno de España financiado con fondos europeos Next Generation EU.
A transformación abrangue 220 metros de rúa e incorpora catro ramplas mecánicas que permiten salvar un desnivel próximo ao 10%. Tamén se ampliaron as beirarrúas, instalouse unha nova pavimentación acorde coa contorna, renováronse as redes de servizos e do alumeado público con tecnoloxía LED e instalouse novo mobiliario urbano.
Esta obra permite ademais prolongar o carril bici existente e completar este eixo de comunicación co Casco Vello, integrando a mobilidade ciclista na renovación integral do Paseo de Granada.
O alcalde puxo en valor a conexión entre o transporte público e o novo corredor mecánico: “Isto significa que o autobús chega a Porta do Sol a través das ramplas”. Desde Porta do Sol, explicou, as escaleiras de II República enlazan coas ramplas do Paseo de Granada ata chegar á zona das paradas de autobús. Así, a actuación completa un dos grandes corredores mecánicos de Vigo, permitindo realizar mediante medios mecánicos o percorrido desde a zona de Montero Ríos e A Laxe ata O Castro, Venezuela e Camelias. A conexión encadea a rampla de Carral, as escaleiras mecánicas de Porta do Sol-II República e as novas ramplas do Paseo de Granada.
