O Goberno de Vigo eleva un 55% as becas de comedor e garante a axuda a todas as familias que cumpran os requisitos

O alcalde anunciou que o Concello incrementa de 45 a 70 euros mensuais a contía das becas de comedor por cada neno ou nena, unha subida de 25 euros ao mes que supera o 50%. O rexedor explicou que a medida responde ao incremento dos prezos, que elevou nuns 20 euros mensuais o custo de cada menú escolar.

Caballero asegurou que o Concello manterá un principio que considera fundamental: todos os nenos e nenas que cumpran os requisitos recibirán a beca de comedor, sen listas de espera. “O orzamento de becas de comedor para as nenas e nenos de Vigo é ilimitado, o que faga falta”, afirmou. O alcalde lembrou que cando chegou á Alcaldía había 1.500 solicitudes en lista de espera e que actualmente esa cifra é cero.

O pasado curso, segundo explicou, o Concello concedeu 3.560 becas de comedor, atendendo todas as solicitudes que cumprían os requisitos. Para este ano recibíronse arredor de 6.000 solicitudes e Caballero garantiu novamente que “todos os que teñan dereito á beca van tela”.

O Concello eleva ademais ata os 2,3 millóns de euros o orzamento destinado directamente ás becas de comedor, unha cantidade que alcanza os 3 millóns de euros ao incluír as achegas relacionadas cos comedores xestionados polas ANPA. “En Vigo as bolsas de comedor págaas o Concello”, subliñou o alcalde.  Caballero contrapuxo este esforzo municipal coa decisión da Xunta de manter conxeladas as axudas aos comedores xestionados polas ANPA, pese ao incremento do custo dos menús. Segundo explicou, mentres Vigo aumenta en 25 euros mensuais cada bolsa, “a Xunta sobe cero euros”, o que, na súa opinión, obrigará ás familias beneficiarias a asumir unha parte maior do custo.

Finalmente, o alcalde sostivo que a competencia en materia de comedores escolares corresponde á Xunta e criticou que sexa o Concello quen asuma en Vigo o financiamento das becas.