Vigo suma máis voos e destinos no programa do IMSERSO para esta temporada
O aeroporto de Vigo lidera en Galicia os voos do IMSERSO tras o incremento promovido polo alcalde, que felicitou ao ministro Bustinduy pola súa sensibilidade co requirimento da cidade.
O alcalde recoñeceu o traballo do ministro de Dereitos Sociais, Consumo e Axenda 2030, Pablo Bustinduy, porque o aeroporto de Vigo será este ano o que conte con maior número de voos do programa IMSERSO en Galicia.
Caballero explicou que o Concello enviou unha carta ao ministro Pablo Bustinduy para trasladarlle a situación de Vigo e solicitar un aumento das conexións. “Fixéronnos caso, e cando che aceptan as cousas hai que dicilo”, destacou o rexedor, quen expresou o seu agradecemento ao Ministerio “pola excelente atención e pola resposta á demanda que fixemos desde Vigo”.
Con todo, os voos do IMSERSO medran ata o 56,43% do total galego, fronte ao 40% do ano 2024, consolidando así a Vigo como o aeroporto líder de Galicia neste programa. Este ano Santiago terá o 37,7% e A Coruña un 5,8%.
No caso dos voos chárter, Vigo pasa de 15 a 52 conexións, ofrecendo destinos como Alacante, Almería, Castelló, Murcia, Xirona, Tarragona, Barcelona, Baleares e Canarias.