Manifesto polo Día Internacional do Pobo Xitano
O Pleno ordinario do mes de abril acolleu a lectura do manifesto con motivo do 8 de abril e da conmemoración dos 600 anos de presenza do pobo xitano na Península ibérica, a cargo de Marina Pereira dos Anjos e Andrea Jales Bastos, en representación da Fundación Secretariado Xitano.
Cúmprense 600 anos da presenza do pobo xitano na Península Ibérica, feito rexistrado a través dun documento que testemuña que o 12 de xaneiro de 1425 Alfonso V, ReI de Aragón outorgou a Juan, Conde de Exipto Menor, un salvoconducto que lle autorizaba a viaxar libremente na súa peregrinación a Santiago de Compostela. Desde entón, o pobo xitano está presente na Península Ibérica, achegando a súa rica expresión artística, o seu léxico, gastronomía, os seus oficios... É imposible imaxinar a cultura española sen que o compoñente xitano forme parte dela.
A configuración da nación e a identidade española ao longo dos séculos construíuse tamén inequivocamente cos elementos achegados polo pobo xitano. A pesar de que pasaron seis séculos e o pobo xitano forma parte esencial do crisol cultural que conforma a sociedade española, o profundo descoñecemento do pobo xitano, da súa diversidade, a súa identidade, a historia e cultura que comparten, están na base do rexeitamento e a discriminación antixitana. O coñecemento que se ten do pobo xitano segue baseado en xeneralizacións, prexuízos ou estereotipos negativos.
Coa aprobación da Constitución e a instauración da democracia, o pobo xitano foi alcanzando cotas de igualdade e mellorando as súas condicións de vida. Con todo, son moitos aínda os retos pendentes: os xitanos e as xitanas son máis pobres, teñen un nivel educativo moi inferior á media que condiciona o seu futuro, levan o peso dunha imaxe social negativa e sofren máis discriminación, especialmente as mulleres, e están sistematicamente fóra da esfera pública e os espazos de poder.
Con ocasión deste 600 aniversario, e da celebración do 8 de abril, Día Internacional do Pobo Xitano, sumámonos ao compromiso dos poderes públicos para avanzar na igualdade e o recoñecemento do pobo xitano, un recoñecemento que pasa por preservar e promover o seu patrimonio cultural: a súa historia e cultura, así como os símbolos de identidade. Para avanzar en igualdade, é necesaria unha resposta decidida fronte á pobreza e a desigualdade estrutural que impiden o progreso social do pobo xitano. Fan falta investimentos e políticas públicas máis ambiciosas e sostidas que lles permitan acceder a un emprego digno, combater o fracaso escolar e a segregación, ou erradicar o chabolismo. É imprescindible tamén respostas institucionais e xurídicas firmes ante os casos de discriminación e discurso de odio.
Por último, convidamos ao conxunto da sociedade para coñecer a historia e cultura do pobo xitano, os valores e tradicións sobre os que se sustenta a súa identidade; convidámosvos a celebrar xuntos estes 600 anos de historia compartida