Abel Caballero: “Imos mostrar as capacidades de Vigo para ser un estudio de gravación”
O alcalde avanzou que a Vigo Film Office participará hoxe e mañá no Shooting Locations Marketplace que se celebra en Valladolid, presentando a nosa oferta para converter a Vigo nun estudio audiovisual.
A Vigo Film Office participará esta semana no evento Shooting Locations Marketplace, que reúne en Valladolid as cincuenta principais produtoras internacionais como Netflix, Apple, Disney, Amazon, Hulu, HBO, NBC Universal, Marvel, Vancouver Media, Warner Bros, entre outros. O obxectivo é amosarlles as diversas posibilidades que ofrece a cidade como plató audiovisual.
Como sinalou o rexedor “presentamos o noso vídeo promocional sobre Vigo como cidade de rodaxes ante produtoras de recoñecido prestixio”, que proceden de Estados Unidos, Reino Unido, Alemaña, Canadá, Italia, México e España. Os grupos de profesionais están interesados en coñecer o potencial de Vigo para desenvolver os seus proxectos xa que a cidade pode ofertar a proximidade entre espazos moi diferentes, como castelos; praias; illas; estradas costeiras; pazos ou arquitectura industrial e contemporánea.
Entre o 22 e o 25 de outubro, teremos en Vigo a profesionais do sector, ós que, como indicou Caballero, “mostrarémoslles localizacións como as Illas Cíes, Pazo de Castrelos, Porto de Vigo e a súa lonxa, a ETEA, o IFEVI, o Casco Lanuxe, o Castro e arquitecturas contemporáneas como o Campus de Vigo ou o Colexio de Arquitectos de Galicia”.