5.000 entradas á venda para seguir o concerto de Sebastián Yatra desde a platea de Castrelos
Abel Caballero anunciou esta mañá que o próximo mércores 6 de xullo sairá á venda a reserva para gozar do concerto de Sebastián Yatra desde a platea de Castrelos. Ao ser de pé, serán 5.000 as localidades dispoñibles para unha actuación prevista o mércores 13 de xullo, ás 22,00 h
A reserva de entradas para gozar da música de Sebastián Yatra desde a platea de Castrelos sairán á venda o mércores 6 de xullo, tal e como avanzou o rexedor. Serán 5.000 as localidades que se poderán adquirir para seguir un espectáculo programado ás 22,00 h do mércores 13 de xullo.
Tal e como se fixo para o concerto de Joan Manuel Serrat, simultanearase a venda online e presencial. Na páxina web municipal quedará habilitado un banner de Vigo en festas-Entradas Castrelos que, a súa vez, redirixirá a unha páxina de reservas na que se poderán adquirir un máximo de dúas entradas por persoa. Para facilitar o acceso de toda a cidadanía -independentemente do seu horario de traballo – as entradas sairán en dúas quendas: 2.000 ás 10,00 h e outras tantas ás 17,00 h. Pensando nas persoas que non teñan acceso ás novas tecnoloxías, poranse outras 1.000 entradas á venda no Auditorio Municipal (500 ás 10,00h e outras 500, ás 17,00h).