Vigo incorpora 16 novos bombeiros e prevé sumar outros 15 como interinos
Segundo informou Abel Caballero este venres, o goberno de Vigo aprobou o nomeamento de dezaseis funcionarios para o corpo de extinción e ultima a creación dunha bolsa de traballo coa que cubrirá outra quincena de postos nos Bombeiros de forma interina.
Trinta e un novos efectivos para o corpo de Bombeiros do Concello de Vigo. Aprobada na Xunta de Goberno Local, o alcalde deu conta este venres do nomeamento como funcionarios de dezaseis bombeiros -catro de eles condutores- con cargo ás prazas vacantes da Oferta de Emprego Público xa realizada, cifra que se aumentará con outros quince interinos.
Os dezaseis mellores clasificados nas últimas oposicións acceden en prácticas e tomarán posesión do seu posto definitivo como funcionarios de carreira tan pronto conclúan o curso selectivo recollido nas bases, que se prolongará durante un mes e medio aproximadamente.
En paralelo, o goberno dirixido por Caballero traballa na creación dunha bolsa de emprego coa que ampliará con interinos o persoal de extinción. Para o alcalde, trátase dunha decisión “moi importante” coa que se sumarán quince efectivos máis “dos que pasaron o exame e acreditaron polo tanto a súa capacidade” na última convocatoria pública. Así, Vigo contará próximamente con trinta e un novos bombeiros municipais: dezaseis como funcionarios e outros quince como interinos.