O Concello dispón 8 brigadas para a mellora dos máis de mil quilómetros de vías municipais
A Xunta de Goberno Local aprobou este martes a adxudicación do contrato de mantemento, acondicionamento e mellora das infraestruturas viarias do Concello por un importe de 8,4 millóns de euros.
O alcalde salientou que este orzamento permitirá atender os 1.006 quilómetros de vías de titularidade municipal, que teñen que ser “vixiados, inspeccionados e mantidos de forma continua e con actuación inmediata para reparar e conservar” toda a extensión desta infraestruturas.
Con este fin, o goberno municipal desenvolve un plan de atención e reconstrución das estradas e das rúas dotado de “8 brigadas de actuación permanente, funcionando algunhas 24 horas ao día”, explicou o rexedor, o que supón dobrar os equipos actuais de atención ao mantemento das vías da cidade.
Segundo expuxo o alcalde “temos 113 millóns de euros en execución en Vigo, o que significa miles e miles e miles de empregos. Significa unha reactivación da economía da cidade por enriba de 600 millóns de euros”, o que cualifica como o “plan máis importante que se está facendo nun concello en España”.