O Concello inicia en Barreiro a creación de nove novos parques caninos
A Xunta de Goberno aprobará a licitación do primeiro recinto, cun investimento de case 169.000 euros, dentro dun programa que superará o medio millón de euros.
O novo parque canino de Barreiro, en Lavadores, suporá un investimento próximo aos 169.000 euros. Este espazo situarase na zona verde e contará cunha área deseñada especificamente para os cans, con espazos compartidos e elementos que permitan o xogo, o exercicio e o paseo en condicións de seguridade e salubridade. O recinto estará completamente valado para que os animais poidan correr e exercitarse con seguridade e disporá tamén de zonas de descanso desde as que os propietarios poderán vixiar as súas mascotas.
O proxecto inclúe bancos, fonte, papeleiras, rede de recollida de augas pluviais, abastecemento e unha boca de rega destinada a facilitar a limpeza e mantemento das instalacións. Os elementos de xogo serán de madeira de piñeiro. Ademais, conservaranse e protexeranse as árbores existentes e incorporaranse novas zonas arboradas e arbustos.
O alcalde explicou que Barreiro será o primeiro dos nove novos parques caninos previstos polo Concello, cun investimento global por riba do medio millón de euros. Aos novos espazos de Barreiro seguirán os proxectados en Navia, rúa Faisán, barrio de Ribadavia, A Bouza, parque da Atalaia, parque María Xosé Queizán, avenida de Castelao e O Calvario, na zona cara á avenida do Aeroporto.
Caballero enmarcou estas actuacións na atención ás necesidades dunha cidade que conta con máis de 45.000 cans rexistrados. Os novos recintos sumaranse aos parques caninos que xa existen en García Picher, duns 500 metros cadrados, e en Ponte Nova, na contorna do paseo do Lagares, que alcanza os 14.000 metros cadrados. “Arrancamos con Barreiro e despois virán todos estes parques”, sinalou.