Escoitar

O alcalde advirte de novas mobilizaciós en setembro se non hai novidades do AVE directo a Madrid

Abel Caballero esixiu este luns que o ministro de Fomento e o presidente da Xunta, que celebran hoxe unha reunión, se pronuncien sobre o AVE directo Vigo-Madrid por Cerdedo. O rexedor avanzou que, de non haber novidades sobre a liña, se celebrarán novas mobilizacións en setembro para reclamar a alta velocidade.

luns, 31 xul 2017
O alcalde censurou esta mañá que o AVE directo Vigo-Madrid por Cerdedo non está na axenda da reunión que celebran este luns o presidente da Xunta de Galicia, Alberto Núñez Feijóo, e o ministro de Fomento, Íñigo de la Serna, e exixiulles que se pronuncien ao respecto.

"Non haberá AVE de Galicia a Madrid en tanto non sexa desde Vigo a Madrid. Será o AVE dunha parte de Galicia, pero non será o AVE de Galicia, que require ineludiblemente que cubra tamén o Vigo-Madrid", asegurou Abel Caballero.

Caballero reclamou un pronunciamento e prazos da Declaración de Impacto Ambiental sobre a variante de Cerdedo para o AVE directo Vigo-Madrid e advertiu dun "inmenso custe político" a quen non cumpra. O alcalde reiterou que a alta velocidade por Cerdedo será unha realidade e anunciou para setembro, de non haber avances, novas mobilizacións para reclamala, despois do concerto ofrecido pola Coral Casablanca na Porta do Sol en demanda do AVE vigués.