Concello de Vigo Vigo org
Xornalxornal.vigo.org
  


Noticias da semana

Suscribirse


 
xoves, 08 de agosto de 2019

Imprimir | Enviar | | Compartir:  


"Os Gobernos Locais xogaremos un papel clave na anticipación contra a violencia de xénero"

O alcalde de Vigo e presidente da FEMP, Abel Caballero, anuncia a creación dun grupo de traballo na Federación para cooperar na proposta normativa contra a trata, logo de reunirse este xoves en Madrid coa vicepresidenta en funcións do Goberno de España, Carmen Calvo.




"Temos unha actuación en moitos Concellos moi envorcada na atención, pero moi dedicada tamén á prevención. Por iso o noso coñecemento sobre o terreo permitiranos xogar un papel aínda máis clave na anticipación contra a violencia de xénero". Así o manifestou o alcalde de Vigo e presidente da FEMP, Abel Caballero, na reunión que mantivo hoxe xoves coa vicepresidenta do Goberno e ministra da Presidencia, Relacións coas Cortes e Igualdade en funcións, Carmen Calvo, para abordar o papel dos Concellos na loita contra a Violencia de Xénero, á vez que anunciou a creación dun grupo de traballo na FEMP para cooperar nunha nova proposta normativa contra a trata de persoas.

Caballero referiuse á repartición da asignación directa aos Gobernos Locais dos fondos previstos nos Orzamentos Xerais do Estado para estas actuacións. Tamén remarcou o importante que fose a aprobación dos anteriores Orzamentos que recollían un incremento de 20 a 40 millóns de euros. "En todo caso actuaremos cos 20 millóns actuais cuns criterios de repartición acordados pola vicepresidenta e eu mesmo, e que mañá tratará o Consello de Ministros, cunha cantidade fixa para cada un dos 8.131 Concellos de España, unha segunda cantidade por habitante e unha terceira que tiña que ver coa presenza no Sistema VioGén dos Gobernos Locais", sinalou o presidente, á vez que animou aos Concellos para adherirse a este sistema.

O alcalde mostrou á vicepresidenta do Goberno o desexo da Federación e dos Concellos de manter a actual liña de traballo baseada na unidade, a cooperación e o consenso. "Nunca é posible a anticipación perfecta pero hai que avanzar nesa dirección e actuar o máis coordinadamente posible. Seguimos dispostos a iso porque a nosa vocación como dirixentes locais é seguir activos e constantes na loita contra as violencias machistas ata erradicalas", sinalou.

Pola súa banda, a vicepresidenta do Goberno, Carmen Calvo, manifestou que "a violencia de xénero é unha ameaza para a democracia", á vez que destacou que os Goberno Locais son fundamentais nesta loita, son a Administración aberta 24 horas. Nesta liña, salientou en que "a democracia será plena, cando sexa plenamente para elas"

Finalmente, tanto Carmen Calvo como Abel Caballero insistiron en que a mensaxe que hai que lanzar contra a violencia de xénero debe ser único, coordinado e firme. Neste sentido, ambos animaron a toda a sociedade a involucrarse neste combate "no que a implicación de todos é imprescindible".
Mais noticias
Abel Caballero informou dos proxectos innovadores vigueses a Pedro Duque, quen se mostrou "impresionado" coa cidade


Volver á portada

© Gabinete de Prensa - Concello de Vigo 2003