O Pazo de Castrelos acende a súa árbore de Nadal recuperando a tradición dos marqueses
O Concello celebra este venres un acto simbólico “con carga de emotividade” recuperando o costume dos marqueses que hai un século instalaban unha árbore no interior do Pazo e convidaba á cidade a visitalo.
“É a primeira vez que se acende a árbore nos tempos modernos”, explicou o alcalde, ao informar sobre a celebración deste venres no Pazo de Castrelos.
Tal e como apuntou, será un “acto simbólico con carga de emotividade” co que “queremos recuperar o costume de hai un século” polo que os marqueses que habitaban o Pazo montaban unha árbore no Nadal e convidaban á cidadanía a velo. “Abrían as portas da finca, do parque e do pazo” á cidade. Caballero sinala que esta árbore foi “seguramente a primeira de Nadal da cidade”, a comezos do século XX.
Con motivo do centenario da doazón do Pazo á cidade, o Museo de Castrelos desenvolveu varias investigacións sobre a historia do monumento e das familias que o habitaron. Na mostra, que pode visitarse, hai exemplos de como era o edificio hai un século, a súa distribución e obxectos que pertenceron ás familias. Así, os historiadores falaron con descendentes de persoas que traballaron no pazo na época dos últimos marqueses e relataron que se acendía unha árbore na planta baixa e a cidade era convidada a visitalo. “Queremos recuperar esta tradición, agora que o pazo está democratizado e pertence a toda a cidade”.
A árbore poderá visitarse no horario habitual do museo: de martes a venres de 10 a 14 horas; os sábados de 17 a 20 horas e os domingos de 11 a 14 horas. Ademais, habilítase un horario especial de visita, entre as 17 e as 20 horas o sábado 6 de decembro e todos os domingos de decembro: 7, 14, 21 e 28.