Vigo reforza o servizo da Policía Local para ofrecer un mellor servizo á cidadanía
A Xunta de Goberno Local deu luz verde este xoves ao estudo de análise e valoración retributiva e funcional de postos de traballo e mellora na organización interna da Policía Local e á aprobación da relación de postos de traballo do ano 2023.
O goberno municipal realizou un estudo da situación da Policía Local co obxectivo de “dar pasos cada vez máis importantes na profesionalización do servizo. Queremos dignificar o labor policial, profesionalizar enteiramente o colectivo e crear unidades específicas con funcións definidas e a súa correspondente valoración retributiva”, tal e como explicou o alcalde en rolda de prensa.
Co resultado do estudo, o Concello reforzará o servizo da Policía Local, de modo que “teremos máis axentes na rúa, máis inspectores e, polo tanto, máis servizo á cidadanía”. Coa nova organización, fortalécense as “condicións de traballo, a organización, presenza e os efectivos. Quero transmitir a importancia da Policía Local e a mellora da súa eficacia e actividade”, incidiu Caballero.
A Xunta de Goberno Local aprobou inicialmente a relación de postos de traballo da Policía Local que deixa a súa estrutura como segue: o xefe é o alcalde, ao que segue un Superintendente, un Intendente principal, un Intendente e catro inspectores principais. Créanse 6 unidades de traballo:
- Unidade de protección e servizos interiores conformada por 139 efectivos: 10 inspectores, 15 oficiais e 114 axentes
- Unidade especial de seguridade con 55 efectivos: 1 inspector especial, 4 oficiais e 50 axentes
- Unidade de protección e investigación (EVAP) con 7 efectivos: 1 inspector, 1 oficial e 5 axentes
- Unidade de mobilidade e transportes composta por 109 efectivos: 1 inspector, 5 oficiais e 103 axentes
- Unidade de atestados e investigación de accidentes con 31 efectivos: 1 inspector, 5 oficiais e 25 axentes
- Unidade de procesos e interiores que suma 55 efectivos: 1 inspector, 4 oficiais e 50 axentes