“Vigo dedica centos de miles de euros a axudas á vivenda e a Xunta nin sequera gasta o que lle dá España”
Abel Caballero denunciou este mércores que a Xunta de Galicia deixou sen executar 30 dos 47,6 millóns recibidos do Estado para garantir o acceso a unha vivenda digna. O alcalde contrapuxo a “incapacidade” autonómica coa acción municipal e explicou que o 75% das axudas de emerxencia que Vigo concede son para vivenda.
En declaracións este mércores no Salón de Plenos do Concello, Caballero tachou de “calamidade” a xestión do goberno autonómico da partida transferida polo Goberno de España ao efecto: “A incapacidade da Xunta de Galicia é un escándalo”.
Asegurou o rexedor que o Estado destinou 47,6 millóns ao goberno presidido por Núñez Feijóo para “garantir o acceso a unha vivenda digna”, dos que “soamente gastaron 17,7 millóns, deixaron sen executar o 63%” cando en Vigo 5.500 persoas están inscritas no rexistro de demandantes de vivenda de protección.
“Eu quero contrapoñer as posicións”, afirmou o alcalde. “A Xunta de Galicia deixa sen gastar trinta millóns e nós, o 75% das axudas de emerxencia que damos son para vivenda”, sinalou Caballero, quen concluíu: “Vigo adica centos e centos de miles de euros de axudas á vivenda a cidadáns de Vigo e a Xunta de Galicia nin sequera gasta o diñeiro que lle dá España”.