O goberno de Vigo aproba este xoves a urbanización dunha parcela próxima ao Mercado de Bouzas
Segundo adiantou este mércores Abel Caballero, a Xunta de Goberno Local prevista para o xoves validará definitivamente o proxecto de urbanización do polígono, un ámbito entre as rúas Tomás Alonso e Covadonga no que se edificarán 27 vivendas. Bouzas gañará unha praza pública de 1.500 m2 e un edificio público para uso cultural.
“Poñemos en marcha un proxecto de gran interese para Bouzas e, polo tanto, para Vigo”, manifestou Abel Caballero en declaracións aos medios, a urbanización do polígono VI do PEPRI de Bouzas, encadrado entre Tomás Alonso e Covadonga, detrás do Mercado de Bouzas.
A promotora prevé erixir cinco bloques de vivendas, de baixo e dúas ou tres alturas, con capacidade para vinte sete pisos, dos que ao Concello lle corresponderán catro que utilizará “para fins sociais, como é natural”. Caballero detallou que este desenvolvemento urbanístico contempla tamén un edificio público de 136 metros cadrados para equipamento cultural, “que boa falta nos fai en Bouzas”.
Co nomeado proxecto, a vila gañará novos espazos peonís de uso libre cunha praza pública duns mil cincocentos metros cadrados, con zonas pavimentadas e axardinadas. Amais, se abre a posibilidade de construír debaixo un estacionamento público en réxime de concesión. A parcela sobre a que se actuará en Bouzas conta en total con preto de tres mil metros cadrados de superficie.